السؤال علينا ..بس الاجابة ع مين؟؟!

[M.B@A]

سؤال:
هلأ اذا عنا ولد صغير 7 - 10 سنين...شرب شي بارد..وتاني يوم الصبح لوزاته التهبو..يعني حالة منشوفها كتير
وطبعا بتكون حرارته مرتفعة...صارت هالحالة وانا موجودة وكان عندي اعتراض على شغلة بيعملوها الأهل وماقدرت أحكي لأنو معلوماتي مو كافية
والشي اللي صار انو أهلو للولد عطوه خافض حرارة ومضاد حيوي "أوغمنتين"....
طيب هون الاذية هي أذية فيزيائية وكان خافض الحرارة بيكفي..ليش المضاد الحيوي؟؟؟ المضاد الحيوي ليقتل الجراثيم!!! ونحنه مُنبَّهين كصيادلة انو ما نعطي صادات حيوية غير اذا متاكدين من الاصابة الجرثومية مشان نحافظ عالفلورا و مشان ما نزيد المقاومة...
طيب هون تصرف الأهل كان خاطئ؟؟ ولا نحنه عكل الأحوال منعطي مضاد حيوي تجنبّا لوجود الجراثيم؟؟ ولا هي الأذية بتأدي لنمو الجراثيم؟؟
عن جد هالموضوع كتييييييير بيحيرني يا ريت شوف اجابة شافية ومشكورين سلفا

هلئ اليوم سألت عن هالشغلة وطلع انو لازم نعطي الطفل خافض حرارة+مضاد حيوي لأنو ارتفاع الحرارة ما بيجي من فراغ وسببه هو الالتهاب(وجود الجراثيم) والجراثيم ممكن تكون وصلت للجسم من الماء نفسه أما الماء البارد بحد ذاته لايسبب التهاب لوزات
هاد اللي بعرفو وإذا عندكن شي معلومة نورونا

[أسبرين]

[IMG]file:///C:/Documents%20and%20Settings/Salem/Desktop/%D8%B5%D9%88%D8%B1%D8%A90650.jpg[/IMG]أهلا زميلة ميوووش

بالنسبة للأذية الي بتصير عند شرب ماء بارد فهي فيزيائية متل ما انت أشرت ، وبتسبب وذمة بالحنجرة (بالمزمار والحبال الصوتية وهي سبب بحة الصوت في حال صار بحة صوت)وممكن تسبب اذية بالبلعوم وباللوزة الحنكية، وهون بيصير عنا جرح وبتغزوه الجراثيم بعد فترة وبيصر عنا انتان ثانوي خصوصي عند الصغار ،، يعني اذا كان العمر متل ما انت ذكرتيه مقبول منطقيا اننا نعطي انتي بيوتك (طبعا تاني يوم عند بيصير عنا حرارة وصعوبة بلع والم بالحلق وممكن يصير زلة تنفسية (خصوصي اذا كان عند الطفل ربو) بس اذا تاني يوم مر ولا صار شي فما في داعي لأدي دوا<تدبير الانتان عند الاطفال ببدايته بيقهيم من الاختلاطات -التهاب ادن وسطى او انتشار الانتان للطرق التنفسية السفلية ....>، واذا كان كبير فمنكتفي بمضادات الوذمة (دانيزا، أدناز ،، وغيرهم -بعتذر لذكر اسماء تجارية-) ومسكنات الالم (يفضل nsaids -كمان الها تأثير مضاد للوذمة)، واذا تطورت عنا اعراض انتان ثانوي هداك الوقت منعطي انتي بيوتك ( احتقان باللوزتين ، بقع قيحية حرارة مرتفعة بشكل مستمر ، عسرة بلع وووو )...
وياريت كل الصيادلة متلك ما يكونوا كريمين بوصف الانتي بيوتك ، لأن بالواقع العملي صايرة الامور شوربة...
اهلا بك وشكرا لتواصلك معنا ...

[mayyoooosh]

مشكور زميل ام بي اي لأنك سألتلي....و يعطيك العافية

و شكرا دكتور أسبرين...دائما بتعطينا الجواب الشافي........و ياريت يجي يوم تنحط فيه قوانين صارمة لاستخدام الصادات الحيوية...بس المشكلة بتبقى القصة فردية...وبتفرق من شخص لاخر...و بتم الجهل مسيطر على نسبة كبيرة من ال..........

[أنس]

واذا تطورت عنا اعراض انتان ثانوي هداك الوقت منعطي انتي بيوتك

طيب ما ممكن نعطي المضادات الحيوية كوقاية لحدوث انتان ثانوي اذا كان محتمل الحدوث ؟؟
متل الحالات اللي بتترافق مع اعطاء كورتيزونات لفترة طويلة .. منعطي مضادات حيوية للوقاية ..

[أسبرين]

أهلا أنس ...
اخي الصادات ما بتنعطى وقائيا وهيك بتقول معظم المراجع والحالات الي منعطي فيها صادات وقائيا كتير قليلة (حمى رثوية منعطي بينسلين مديد للوقاية من تكرر اصابة البلعوم واللوزات بالمعقديات a الحالة للدم ،، مثلا كسر قاعدة جمجمة مع سيلان سائل دماغي شوكي لما يصير عنا التهاب سحايا مميت ..) والمراجع البريطانية ما بتعترف بصاد كوقاية (الدكتور خلدون طباع بيصرع راسنا بهي الشغلة )، الصادات للعلاج بيكون عندك انتان مثبت (ومنهم بيتشددوا بالزرع <التحاليل عندهم مجانية عنا بتكلف المريض 2-3الف وما كلهن خرج يحطوها مشان تقله بالاخير مبروك عندك التهاب رح اعطيك انتي بيوتك > ...الافضل اننا نستنى الاعراض السريرية وبعدها نعطي الانتي بيوتك وما ننتظر ...
وبحالة اعطاء الستيروئيدات بشكل مزمن ما منعطي صاد للوقاية لأن ما في داعي بس اذا حسنا صار عنا انتان هداك الوقت منعطي صاد مناسب للحالة والافضل نشوف نتيجة الزرع لنضمن نتيجة افضل( يعني التهاب مجاري بولية منعطي امينوغليكوزيد ، التهاب سحايا سفترياكسون مع صاد قاتل آخر متل اللينكو مثلا بس بعد ما ناخد عينة للزرع (هون الزرع ضروري جدا بس منعالج تخبريا ريثما تطلع نتيجة الزرع ) ، التهاب اذن وسطى منعطي سيفالوسبورين جيل ثالت ، ذات رئة منعطي سيفالوسبورين جيل تاني او ماكروليدات او او او .)..
الصادات نعمة كبيرة ونحن بوصفها عشوائيا عنخرب وسائل دفاع كبيرة ضد الامراض رح تخسرها الاجيال القادمة بعدنا ...

[SABRI]

الصادات نعمة كبيرة ونحن بوصفها عشوائيا عنخرب وسائل دفاع كبيرة ضد الامراض رح تخسرها الاجيال القادمة بعدنا ...

المختصــر المفيـــــد

[ASPIRIN]

هلأ سؤال جديد :
غلوكوفير هو غلوكونات الحديدي ويستخدم لعلاج فقر الدم
ويعطي بشكل امبولات بس بنشربو شرب (يعني ابر شرب )
سؤالي : ليش مامنعطين عن طريق الحقن مثلا كما في بقية الامبولات ؟؟ وليش منستخدم هالطريقة
(تناول الدوا المصنع على شكل امبولات عن طريق الفم)؟؟؟
يعني كان فينا نصنعن على شكل شرابات اذا كان تناولن عن طريق الفم الو توافرحيوي أفضل من ناحية سرعة ومكان التأثير مو أفضل ما نصنعن على شكل امبولات وناخدن متل الشرابات؟؟!!!!بقا لشو هاللف والدوران !

[ASPIRIN]

شو مافي اجابة ع السؤال ؟؟؟؟ يعني منعلقو ..ههههه

[BESANA]

سؤالي : ليش مامنعطين عن طريق الحقن مثلا كما في بقية الامبولات ؟؟

الحديد لما بينعطى حقن بسبب تخريش كبير للوريد

اذا اضطرينا وعطيناه(هاد في حالات النزوف الهضمية ) بدو أيدي خبيرة جدا

مواي احد بيعطي حقنة فيو يعطي ابرة حديد


لهيك دايما منلجا لاعطاء الحديد فمويا

ودايما منطلب من المريض ياخدها مع شي من الطعام

لانها ممكن كتير تسبب اضطرابات هضمية

اذا انتبهتي على انبولة الحديد

بتكون في قطعة بلاستيكية هي يلي بتحوي المادة الفعالة

لما نبيع العلبة منعلم المريض كيف يضغط على القطعة البلاستيكية


لحتى تنزل المادة وتنحل بالمحل وتنشرب فورا

على الاغلب انو صنعها على شكل شراب بقلل من ثباتيتها...يمكن بسبب تشكل هدروكسيدات واو بيغير من تكافؤ المعدن

مابعرف بالضبط


انشالله يكون جوابي فادك

[قطرة الندى]

هلأ في دوا اسمو ريسبيرا وهو مقشع وحال للمفرزات القصبية مكتوب عليه رج الزجاجة جيداً قبل الاستخدام مع إنو شراب مش معلق ؟ سؤالي إنو الشراب بتكون المادة منحلة فيو بشكل كامل ليش الرج؟
تاني شي دوا سلوفاج للسكري مكتوب
بالراشيتة يطرح في البول دون تبدل . كيف يعني دون تبدل على هالحالة ما استفاد الجسم منو شي دخل وطلع متل ما هو ولا هالشي بيصير مع كل الأدوية بيستفيد منها الجسم ثم يطرحها كلها وتاني سؤال مكتوب كمان إنو لايخضع للاستقلاب الكبدي أو الإطراح الصفراوي ليش ما كل الأدوية لازم تمر بمرحلة الاستقلاب الكبدي ولا في استقلاب بمحل تاني لإلو أم لا يتعرض أبداً للاستقلاب